TOP

Челобитная нижегородских попов во главе с Иваном Нероновым патриарху Иоасафу I (1636 г.)

Впервые опубликовано Н. В. Рождественским: «Чтения в имп. Обществе истории и древностей российских», 1902, кн. 2. М., 1902.

Сохранена орфография и пунктуация первой публикации:

Великому гсдрю стейшему Иосафу патриярху московскому и всеа Русии бьют челом нищий ваши гсдревы бгомолцы, Нижнево Нова града приходных црьквей попы: поповской староста Оуспенскои поп Симеон, да Вознесенской поп Анофрей, да Николской поп Мелентей Емельянов, да Происхожденскои поп Тит Емельянов, да Сергиевской поп Андреи Трофимов, да Георгиевской поп Василей Никитин, да Покровской поп Иван Гавриилов, да Казанския Богородицы поп Трифон Алексеев, да Воскресенской поп Иван Неронов — о мятежи црковнем и о лжи християнства: за леность и нерадение поповское от многаго пиянства и безчин-ства, по Двдву гсдрь слову, погибе блгоговейныи, и оу-малишас истинны и несть исправления, потому гсдрь, что стало от вас гсдрей великих стителей и наставников заочно, по своей воли без страха повыкли жити, яко заблуждьшая, не имуще пастыря.

В црквах гсдрь зело поскору пение, не по правилом стых отц ни наказанию вас гсдрей, говорят голосов в пять и в шесть и боле, со всяким небрежением, поскору. Ексапсалмы гсдрь такоже говорят с небрежением не во един ж голос и в ту ж пору и псалтыр и каноны говорят, и в ту ж пору и поклоны творят невозбранно. А сщенницы гсдрь о том мир не наказывают, чтоб стояли в црькви со страхом и блгочинно, по правилом стых апсл и стых отц и вас гсдрей, и о поклонех, како подобает во время поклонитис, а се гсдрь литоргии Бжии служат без часов, толко отпустом начинают […] И това гсдрь обычая в началах оу православнаго християнства ни оу вас великих стителей не бывало, и в том гсдрь неисправлении лжа явис пред Бгом, а верным гсдрь людем смута и о вере повреждение. Видим гсдрь в наставницех и в црьквах неисправление, и оттого им смущается оум и скудеет вера, потому что гсдрь вожди ослепоша леностию и нерадением исправления црьковная погасиша.

Да пономари гсдрь по црквам молодыя без жен, да тако ж гсдрь многия по многим црквам поповы дети во время стыя службы в олтари безчиннуют […] а прокураты гсдрь и шпыни не дадут в црькви со страхом и в безмолвии со вниманием бжественных послушати. Ходят гсдрь чрез всю црков невозбранно со всяким безстрашием и нечистотою, яко разбойницы неистовии, разоряюще црьков клопоты и кличи, и пискания и мятежи творяще великия в црквах; ходят гсдрь толпами человек по десятку и боле, да те гсдрь толпы выдут а инии внидут, и безпрестани гсдрь от них в црквах велика смута и мятеж, иногда дерутся в црквах и бранятся; а инии гсдрь прокураты ходят, повеся на выю образ Бжий, а инии полагают пелены на блюде и свещи, собирают, рекуще: на созидание црьквам, а потом их мнози видят со пияницами; а инии проданными себе называют и на окуп просят, а сказываются розными имены и грады; а инии творятся бешеными, и потом их видят целоумных; а инии гсдрь ходят во образе пустынническом и во одеждах черных и веригах, разтрепав котыни, а инии помазывают нозе гноем, кров сливаючи с мозгом и ползают по црьквам, писк творяще, и велик соблзн полагают в простых члвцех. И от того гсдрь мятежа и прокуратства црьков в великом разорении и несмирении, по Гсдню словеси: Дом Мой, дом млтвы, сотвориша вертеп разбойник.

Да еще гсдрь о празницех Гсдьцких — о Рожестве Хсве и о Бгоявлении, ихже стии отцы оуставиша православным християном дховно празновати и со страхом и блгоговением стояти и дховная словеса бжественных писании со вниманием послушати, на се бо нас и созывают бжественнии праздницы, и писания повелевают дховно веселитися и оудивлятис милосердию Бжию, от невидимых существ сошедшаго и неприступнаго дому Жител, нань ж не смеют зрети чинове нбснии, члвк изволи быти члвка ради. В нас ж гсдрь сия пренебрегома и, яко что неистинно дело, презираемо, и вся противно творим и ругателно праздником Гсдьским: вместо радости дховныя, и возделание творят радости бесовской, многими гсдрь еллинскими и бесовскими играми дни сия провожают. От Рожества Хсва и до Бгоявления делают гсдрь по домох игрища и собираются на той злой зер зело по многу мужи и жены, и игры творят всякого бесовскаго мечтания многими образы злыми, ругаются млосердию Бжию и Пречстыя Его праздником. И делают гсдрь лубяныя кобылки и туры и оукрашают полотны и шелковыми ширинками и повешивают колоколцы на ту кобылку, а на лица своя налагают личины кос-матыя и зверовидныя и одежду таковую ж, а созади себе оутвержают хвосты, яко видимыя беси, и срамная оудеса в лицех носяще и всякое бесовско козлогласующе и объявляюще срамныя оуды, а иные в бубны бьюще и плещуще и пляшуще, и ина неподобная творяще, и сим гсдрь образом не токмо по домох, но и по оулицам града и по селом и по деревням ходяще, яко неистовии блудницы, и не стыдящеся образа Бжия и честнаго имени християнскаго и спону гсдрь велику християнству творяще. Сонмы, гсдрь, за ними ходят великия, и безчисленно душ християнских погубляют сим мечтанием бесовским, и мзды им дают, слугам сатанинским, и отводят гсдрь помышления члвком от празнования дховного видимым сим сатанинским служением. А в навечери гсдрь Рожества Хсва и Бгоявления такожде ходят по оулицам толпами и поют бесовския песни и кличют коледы, творят затеи бесовския.

Да еще гсдрь к сим. В шестой четверток по Пасце на празник Вознесения Хсва тако ж противляются празнику Хсва Вознесения. В Печерской монастыр ходят — понеж там храм во имя Хсва Вознесения, от града отстоит две версты, — ходят гсдрь из града мужи и жены, из сел и из деревен съежаются, а корчмиты гсдрь с кабаками и со всякими пьяными питии, а игрецы и медветчики и скомороси з бесовскими оружии, и собрався гсдрь к тому Печерскому мнастырю, и мнятся празновати сицевым образом: медветчики с медведи и плясовыми псицами, а скомороси и игрецы с личинами и с позорными блудными орудии, з бубнами и с сурнами и со всякими сатанинскими блудными прелесми, и злыя гсдрь прелести бесовския деюще, пьянствующе, пляшуще и в бубны бьюще и в сурны ревуще и в личинах ходяще, и срамная в руках носяще, и ина неподобная деюще, их же как сатана наоучил противитис празнику Вознесению Хрсву. И зело гсдрь ослабеюще род члвческий от многих прелестей сатанинских и позабывающе судбы Бжия, како не пощаде перваго мира примесившихся сыном Бжиим ко дщерем члвческим и протчих судеб Бжиих, иж в наказание наше […] И в пастырех гсдрь наказания оскудеша, и на пиянство оустремишася; и которыя гсдрь от вас гсдрей к нам грамоты приходят о исправлении християнства и в наше гсдрь наказание, и о бывшем гсдрь при твоей стительской пастве от образа Спсова и о истекших слезах и в наше гсдрь наказание, к нашему воздержанию и трезвости, — и протопопы гсдрь нам тех грамот почасту не прочитают и, по вашему гсдреву наказанию, от пиянства оудалятис и от всякого безчинства не вазбраняют и не наказуют.

И тех гсдрь злых затей бесовских — непрезнованных праздник, позорных всенародных соборищ на всякое лето бывает четыре зборища, оприч того, что о Рожестве Хсве. Первое гсдрь — на празник Вознесения Хсва, оу Печерского мнастыря, о нем ж сказахом, а второе гсдрь — в седмыи четверток по Пасце, на оубогих домов, третье гсдрь — на праздник Сошествия Стаго Дха, в селе Высоком: в том селе храм Стаго Дха, а от града гсдрь две версты; четвертое гсдрь зборище — на праздник Рожества Иванна Прдтчи: на поле сходятся такова ж ради позорнаго играния и пьянства. Да те гсдрь позорища повычны: с сел и з деревен съежаются, и бывают многонародныи зело безчинства, полны и оубииства, яко ж оуказахом оу Печерскаго мнастыря.

Да в седмыи ж гсдрь четверток по Пасце собираются жены и девицы под древа, под березы, и приносят, яко жертвы, пироги и каши и яичницы, и поклоняс березам, и оучнут походя песни сатанинския приплетывая пети и дланми плескати, и всяко бесяся, седчи, поядят те приносы; и востав от яди, кояждо их поимутся две-две, и пришед к той березе, и зовьют тоя березы ветви в колца и скозе те колца творят целование, и от того целования беззаконнаго зовутся кумами и разходятся, а на праздник Сшествия Стаго Дха паки сходятся тем же обычаем; тако ж песни сатанинския с плескою поют и тако, поедчи приносы, паки целование творят в тех же колцех, и поломав тоя березы ветви вершее, промеж кои целовались, и свив ветки, полагают их на главах своих и сносят на воду.

И теми гсдрь затеи бесовскими не токмо от простых людей неоуков повыкли делати, но и честных людей жены и дети и от поповскаго чину наоучил враг противлятис Бгу и праздником Хвым.

Да на праздник же гсдрь Рожества Хсва и Иванна Прдтчи по селам и по деревням кладут огни по полям и чрез всю нощь и до самого солнечнаго возхода играют и чрез те огни скачют жонки и девки, и тако творят от Рожества Иванна Прдчи и до Петрова дни.

И всякаго гсдрь беззаконнаго дела оумножилос: еллинских блядословий и кощун и игр бесовских, и ядят гсдрь оудавленины и по торгом, ей, продают оудавленину, гуси и оутки и тетереви и зайцы, их же подобает православным християном ясти. Да еще гсдрь друг другу лаются позорною лаею, отца и мтре блудным позором, в род и в горло, безстудною самою позорною нечистотою языки своя и дши оскверняют.

Да сходятся гсдрь не токмо люди молодыя, но и старыя в толпы, и бывает бои кулачныя великия и смертнаго оубийства много жевет в тех их играх, и многия без покаяния пропадают.

Да о празднице гсдрь в великую Светлую ндлю ходят медветчики и скомороси по двором и по оулицам и творят игры безчинныя, ругаются празднику Воскресению Хсву, да на той же гсдрь ндли поставляют на лобных местах качели, и многия люди приходя качаются и с качелей оубиваются до смерти и пропадают меж собою також без покаяния; и всякого гсдрь неистовства зело много, а никим же гсдрь возбраняеми ни обличаеми, ни запрещаеми ни от сщенник наказаеми, ни от соседей оустрашаеми, таковая творят неподобная.

Великий гсдрь, стейшии Иоасаф патрярх Московский и веса Руси, смилуис, подай темным в неведении свет и слепым прозрение и немощным целбу: тебе гсдрь избра Бг вместо себе на земли и показа тя воинствовати и соблюдати грады дшевныя и телесныя, гсдрь, якож рече Гсдь: се Аз и дети, яже ми даде Бг. Помилуй гсдрь нас, подобнич Бжии и страдалче дшевныи, о неисправлении црьковнем: о часех со обеднями и о постных безвременных вечернях и о мятежи црковнем от шпыней о безстудстве християнства: оучини гсдрь свой стителской оуказ, чтоб по преданию стых апсл и стых отц истинно славился Бг и до конца бы цркви Бжия в лености и в небрежении не разорилась, и нам бы в неисправлении и в скудости веры до конца не погибнути, и вели гсдрь на те дела о црковнем исправлении, как пети часы и вечерни в пост великий и о мятежи црковнем, что неистовствуют в церквах шпыни и прокураты и о играх бесовских дати свои гсдревы стителския грамоты.

Великий гсдрь, смилуйся, пожалуй!

——

Источник: Библиотекарь.Ру

Иллюстрация: Музей Агафонова

Рассказываю о жизни Поволжья, интересуюсь журналистикой.